پریس ریلیز
کراچی، 23 اپریل 2026:
پاکستان سائنٹیفک اینڈ ٹیکنالوجیکل انفارمیشن سینٹر (پاسٹک) سب سینٹر کراچی، جو پاکستان سائنس فاؤنڈیشن (PSF)، وزارت سائنس و ٹیکنالوجی کے تحت کام کر رہا ہے، نے بدھ کے روز “ریسرچ سپورٹڈ اے آئی ٹولز” کے موضوع پر ایک معلوماتی ویبینار کا کامیاب انعقاد کیا۔
ویبینار میں ملک بھر کے مختلف تعلیمی و تحقیقی اداروں سے تعلق رکھنے والے تقریباً 100 طلبہ، محققین، اساتذہ اور پیشہ ور افراد نے شرکت کی۔
اس موقع پر خطاب کرتے ہوئے اسسٹنٹ ڈائریکٹر پاسٹک سب سینٹر کراچی، محترمہ افشین طارق نے پاسٹک کے کردار پر روشنی ڈالتے ہوئے کہا کہ ادارہ ملک میں سائنسی تحقیق کے فروغ اور جدید معلومات کی فراہمی میں اہم کردار ادا کر رہا ہے۔ انہوں نے بتایا کہ پاسٹک قومی و بین الاقوامی سائنسی ڈیٹا بیسز تک رسائی، تربیتی پروگرامز کے انعقاد اور محققین کی رہنمائی کے ذریعے تحقیقی صلاحیتوں کو مضبوط بنانے میں معاونت فراہم کرتا ہے۔
ویبینار کی ریسورس پرسن، ڈاکٹر مریم ابرار، ایڈیشنل ڈائریکٹر، پاسٹک نیشنل سینٹر اسلام آباد تھیں، جنہوں نے آرٹیفیشل انٹیلیجنس (AI) کے تحقیقی میدان میں استعمال پر جامع اور معلوماتی پریزنٹیشن دی۔ انہوں نے مختلف اے آئی ٹولز کے ذریعے ڈیٹا کے تجزیے، تحقیقی تحریر اور مجموعی تحقیقاتی عمل کو مؤثر بنانے کے طریقوں پر روشنی ڈالی۔
شرکاء نے ویبینار میں بھرپور دلچسپی کا مظاہرہ کیا اور سوال و جواب کے سیشن میں فعال شرکت کی۔ ویبینار کو اس کی عملی افادیت اور موجودہ دور کے تحقیقی تقاضوں سے ہم آہنگ ہونے کے باعث سراہا گیا۔
اختتامی کلمات میں محترمہ افشین طارق نے ریسورس پرسن کا شکریہ ادا کیا اور شرکاء کی بھرپور شرکت کو سراہا۔ انہوں نے شرکاء کو مستقبل میں پاسٹک کے پروگرامز سے مستفید ہونے کی بھی ترغیب دی۔
