ویسٹ انڈیز کے جارح مزاج بیٹر کیرون پولارڈ نے ٹی20 کرکٹ کی تاریخ میں سب سے زیادہ رنز بنانے والے کھلاڑی کا اعزاز حاصل کر لیا ہے اور اپنے ہی ہم وطن لیجنڈ کرس گیل کا طویل عرصے سے قائم ریکارڈ توڑ دیا ہے۔
39 سالہ پولارڈ نے یہ سنگِ میل میجر لیگ کرکٹ (MLC) کے افتتاحی میچ میں ایم آئی نیویارک کی جانب سے ایک دھواں دار ناقابلِ شکست سنچری اسکور کرتے ہوئے عبور کیا۔ اس اننگز کے بعد ان کے ٹی20 کیریئر رنز 14,582 تک پہنچ گئے، جبکہ انہوں نے کرس گیل کے 14,562 رنز کا ریکارڈ پیچھے چھوڑ دیا۔
کرس گیل مارچ 2014 سے ٹی20 رنز کی فہرست میں سرفہرست موجود تھے، تاہم پولارڈ نے 12 سالہ حکمرانی کا خاتمہ کر دیا۔ خاص بات یہ ہے کہ پولارڈ نے یہ کارنامہ زیادہ تر مڈل اور لوئر آرڈر میں بیٹنگ کرتے ہوئے انجام دیا، جبکہ گیل اوپننگ بیٹر کے طور پر کھیلتے رہے۔
پولارڈ ٹی20 کرکٹ میں سب سے زیادہ میچز کھیلنے والے کھلاڑی بھی بن گئے ہیں، جنہوں نے اب تک 736 میچز میں شرکت کی ہے۔
